આ ગુજરાતનું નહીં, હિમાચલનું ઉના છે, રજાઓમાં બનાવી લો ફરવાનો પ્લાન

જ્યારે પણ પહાડોનો ઉલ્લેખ કરવામાં આવે છે, ત્યારે સૌથી પહેલું નામ મનમાં આવે છે તે છે હિમાચલ પ્રદેશ. હિમાચલ પ્રદેશ ભારતના સૌથી સુંદર રાજ્યોમાંનું એક છે. અહીંની પ્રાકૃતિક સુંદરતા દરેકને દિવાના બનાવી દે છે. હિમાચલ પ્રદેશમાં એવી ઘણી જગ્યાઓ છે જ્યાં બહુ ઓછા લોકો ફરવા જાય છે એટલે ત્યાં ભીડભાડ ઓછી અને શાંતિ વધારે હોય છે. આવા સ્થળો ખરેખર અદ્ભુત હોય છે. ઉના હિમાચલ પ્રદેશમાં આવી જ એક જગ્યા છે. સુંદર ખીણો અને લીલાછમ જંગલોથી ઘેરાયેલું ઉના જોવા જેવું છે. તમારે એક વાર આ સ્થળની મુલાકાત ચોક્કસ લેવી જોઈએ.

ઉના એ હિમાચલ પ્રદેશમાં સ્વાન નદીના કિનારે સ્થિત એક મુખ્ય જિલ્લો છે અને એક લોકપ્રિય પ્રવાસન સ્થળ છે. ઉના ઘણા પ્રવાસન સ્થળો માટે પ્રખ્યાત છે. સ્થાનિક લોકોના જણાવ્યા અનુસાર, ઉના નામ શીખોના પાંચમા ગુરુ શ્રી ગુરુ અર્જન દેવ દ્વારા આપવામાં આવ્યું હતું. હિન્દી ભાષામાં "ઉના" શબ્દનો અર્થ "પ્રગતિ" થાય છે. ઉના જિલ્લો 1972 માં પંજાબના હોશિયારપુર જિલ્લામાંથી અલગ કરવામાં આવ્યો હતો. ઉનામાં ફરવા માટે ઘણા સુંદર પર્યટન સ્થળો છે, જ્યાં દૂર દૂરથી લોકો આવે છે. આવો જાણીએ ઉનાના આ પ્રખ્યાત પર્યટન સ્થળો વિશે -

પોંગ ડેમ

બિયાસ નદી પર બનેલો પૉંગ ડેમ ઉનાના પ્રખ્યાત આકર્ષણોમાંથી એક છે. આ વિસ્તાર સમુદ્રની સપાટીથી 450 મીટરની ઉંચાઈ પર આવેલો છે અને પૉંગ ડેમને 1983માં વન્યજીવ અભયારણ્ય તરીકે જાહેર કરવામાં આવ્યું હતું. પૉંગ લેક અભયારણ્ય વનસ્પતિ અને પ્રાણીસૃષ્ટિની વિશાળ શ્રેણીનું ઘર છે. આમાં બાર્કિંગ ડિયર, જંગલી રીંછ, નીલગાય, ક્લોલેસ ઓટર અને દિપડા જેવા પ્રાણીઓનો સમાવેશ થાય છે. આ ઉપરાંત, તમે અહીં પક્ષીઓની વિવિધ પ્રજાતિઓ જોઈ શકો છો. પિકનિક માટે આ એક આદર્શ સ્થળ છે.

થાનેક પુરા

ઉનાના ચિંતપૂર્ણી દેવી મંદિરથી લગભગ 3 કિમીના અંતરે આવેલું થાણેક પુરા એક મુખ્ય પ્રવાસન સ્થળ છે. આ સ્થળ રાધા કૃષ્ણ, ગુગા જહાં પીર અને મહિયા સિદ્ધ જેવા તીર્થસ્થાનોથી ઘેરાયેલું છે. આ જગ્યાએ લગભગ 60 પગથિયાં ધરાવતો એક પ્રાચીન કૂવો છે, જે પ્રવાસીઓમાં ખૂબ જ લોકપ્રિય છે. અહીં દર વર્ષે કૃષ્ણ જન્માષ્ટમીના પર્વ પર મેળાનું આયોજન કરવામાં આવે છે. આ સમયગાળા દરમિયાન અહીં યજ્ઞ, વિશાળ ભંડારા અને કુસ્તી સ્પર્ધાનું આયોજન કરવામાં આવે છે. આ જગ્યા ચાટ બજાર માટે પણ જાણીતી છે.

ડેરા બાબા ભરભાગ સિંહ

ડેરા બાબા ભરભાગ સિંહનું ગુરુદ્વારા ઉનાથી લગભગ 40 કિલોમીટરના અંતરે આવેલું એક લોકપ્રિય ધાર્મિક સ્થળ છે. તે સ્થાનિક રીતે ગુરુદ્વારા મંજી સાહિબ તરીકે ઓળખાય છે. આ ગુરુદ્વારા પહાડીની ટોચ પર આવેલું છે અને સુંદર નીલગીરી વૃક્ષોથી ઘેરાયેલું છે. એક પ્રખ્યાત સંત બાબા ભરભાગ સિંહે આ મંદિરની સ્થાપના કરી હતી અને તેને પ્રખ્યાત સમાજ સુધારક અને ધાર્મિક નેતા બાબા રામ સિંહના પુત્ર બાબા ગુરબર્ગ સિંહને સમર્પિત કર્યું હતું. દર વર્ષે અહીં ફેબ્રુઆરી અને માર્ચ વચ્ચે બાબા ભરભાગ સિંહ મેળો અથવા હોલા મોહલ્લા ફેર નામનો તહેવાર યોજવામાં આવે છે. બાબા ભરભાગ સિંહ તેમની ચમત્કારિક શક્તિઓ માટે સ્થાનિક લોકોમાં લોકપ્રિય હતા.

ચિંતપૂર્ણી મંદિર

ઉના શહેરમાં આવેલું ચિંતપૂર્ણી મંદિર માત્ર ઉનાનું જ નહીં પરંતુ સમગ્ર રાજ્યના સૌથી પવિત્ર મંદિરોમાંનું એક છે. માતા સતીને સમર્પિત ઉનાનું આ મંદિર 51 શક્તિપીઠોમાંનું એક છે. અહીં માતાને છિન્નમસ્તિકા દેવી તરીકે પણ ઓળખવામાં આવે છે. ઉના મંદિર સોલા સિંઘી શ્રેણીના સૌથી ઊંચા શિખર પર આવેલું છે. આ કારણે અહીંથી પહાડો અને આસપાસના વિસ્તારોનો ખૂબ જ સુંદર નજારો જોઈ શકાય છે. જો તમે ઉના આવો છો તો આ મંદિર જોવાનું ભૂલશો નહીં.

પીર નિગાહ

પીર નિગાહ ઉનાના બસોલી ગામમાં આવેલું એક પ્રખ્યાત ધાર્મિક કેન્દ્ર છે. ઉના શહેરથી લગભગ 8 કિમીના અંતરે આવેલા આ મંદિરમાં દરરોજ અનેક યાત્રાળુઓ આવે છે. દર ગુરુવારે પીર નિગાહ મેળાનું આયોજન કરવામાં આવે છે. જો કે, મહિનાના પ્રથમ 'જેઠા વીરવાર'નું ધાર્મિક મહત્વ છે જેના કારણે દૂર-દૂરના વિસ્તારોમાંથી મોટી સંખ્યામાં લોકો આ સ્થળની મુલાકાત લે છે.

કુટલહર કિલ્લો

કુટલહર કિલ્લો, જેને સોલાહ સિંઘીના કિલ્લા તરીકે પણ ઓળખવામાં આવે છે, તેની ગણતરી ઉનાના પ્રખ્યાત પર્યટન સ્થળોમાં થાય છે. સમુદ્ર સપાટીથી 4500 મીટરની ઉંચાઈ પર સ્થિત આ કિલ્લો કાંગડાના રાજા સંસાર ચંદ્ર દ્વારા બનાવવામાં આવ્યો હતો. પ્રથમ શીખ વંશના મહારાજા રણજીત સિંહે 1809માં આ કિલ્લાઓનું નવીનીકરણ કરાવ્યું હતું. આ કિલ્લાઓની છત વિશાળ પથ્થરના સ્લેબથી બનેલી છે. અહીંથી ગોવિંદ સાગર તળાવ અને પોંગ ડેમનો અદ્ભુત નજારો જોવા મળે છે. કિલ્લાની નજીક આવેલા અન્ય પ્રવાસી આકર્ષણોમાં રાયપુર પેલેસ, કુટલહર ફોરેસ્ટ, બિલાસપુર, પિપલુ અને બંગાના છે.

બાબા રૂદ્રાનંદ આશ્રમ

બાબા રુદ્રાનંદ આશ્રમ ઉના જિલ્લાના આમલેહર ગામમાં આવેલું એક મહત્વનું પર્યટન સ્થળ છે. આ આશ્રમ વાર્ષિક ઉત્સવ માટે જાણીતો છે, જેનું આયોજન કુશોપતિની અમાસ તેમજ શ્રી કૃષ્ણ જન્માષ્ટમી, મકરસંક્રાંતિ અને શિવરાત્રીના શુભ પ્રસંગે કરવામાં આવે છે. નિર્જલા એકાદશી મેળો, પંચ ભીષ્મ મેળો, વ્યાસ પૂજા અને બાબા રુદ્રુની જન્મજયંતિ જેવા ઉત્સવો અને મેળાઓ પણ અહીં ખૂબ જ ઉત્સાહથી ઉજવવામાં આવે છે. આશ્રમમાં રહેવાની સગવડ છે જ્યાં ભક્તો તેમની યાત્રા દરમિયાન આરામ કરી શકે છે. અહીં 'અખાડા ધુઆં' પણ પ્રવાસીઓને આકર્ષે છે. તે એક પવિત્ર રાખ માનવામાં આવે છે જે 1850 થી પ્રજ્વલિત છે.

કેવી રીતે પહોંચવું?

ફ્લાઇટ દ્વારા: જો તમે હવાઈ માર્ગે ઉના જવાની યોજના બનાવી રહ્યા હોવ તો નજીકનું એરપોર્ટ અમૃતસરનું શ્રી ગુરુ રામદાસ જી એરપોર્ટ છે. ઉના અમૃતસરથી લગભગ 160 કિમી દૂર છે. અમૃતસરથી ઉના જવા માટે તમને બસ અને ટેક્સી બંને મળશે. થોડા કલાકોમાં તમે તમારા મુકામ પર પહોંચી જશો.

ટ્રેન દ્વારા: જો તમારે રેલ્વે દ્વારા ઉના જવું હોય તો ઉનામાં જ એક રેલ્વે સ્ટેશન છે. ઉના રેલ્વે સ્ટેશન ઘણા મોટા શહેરો સાથે સારી રીતે જોડાયેલું છે. તમે દિલ્હી, ચંદીગઢ અને હરિદ્વારથી ઉના માટે સરળતાથી ટ્રેન મેળવી શકો છો.

વાયા રોડઃ તમે રોડ માર્ગે પણ ઉના આવી શકો છો. તમે હિમાચલ પ્રદેશના ઘણા શહેરોમાંથી ઉના માટે સરળતાથી બસ મેળવી શકો છો. આ સિવાય જો તમે તમારી પોતાની કાર દ્વારા આવવા માંગતા હોવ તો ઉના આવવામાં કોઈ તકલીફ નહીં પડે.

દેશ-વિદેશના પ્રવાસ પ્રસંગો અને તમારી મુસાફરીના અનોખા અનુભવો શેર કરો, આ સિવાય અન્ય મુસાફરો ક્યાં જઇ રહ્યા છે અને તેઓ શું કરી રહ્યા છે? તે પણ જાણો. એકબીજાની સાથે ફરીએ અને એક બીજાને ગમતા રહીએ

તમારા જેવા લાખો ફરવાના શોખીન લોકોની જેમ તમે પણ Tripoto પર તમારા પ્રવાસની તસવીરો અને અનુભવો શેર કરો

મફતમાં ટ્રાવેલ કરવા માંગો છો? Tripoto પર આવી ક્રેડિટ મેળવો અને પછી તમારા આગામી પ્રવાસમાં હોટેલ બુકિંગ તેમજ વેકેશન પેકેજ મેળવો

Tripoto ગુજરાતીને ફેસબુક પર ફોલો કરવા માટે અહીં ક્લિક કરો