Uttarakhand yani Jannat- Binsar-Ranikhet-patal Bhuvaneshwar

Tripoto
Photo of Uttarakhand yani Jannat- Binsar-Ranikhet-patal Bhuvaneshwar by Manas Agarwal

Bahut saare meethe anubhav potli main samaye aaj hi uttrakhand se lauta hun, aur apni yatra ka varnan suna raha hun.

Garmiyo main pahado se zyada achchi jagah ghoomne ke liye kya ho sakti hai, humne bhi is baar garmiyo ki chuttiyon main pahado pr ghoomne ka karyakram banaya tha. Main aur mere kuch dost paper khatam hote hi agle din uttrakhand ghoomne nikal gaye. Is bar dosto ke saath ja raha tha isliye utsah charamseema pr tha.

Subah subah 4 baje gaadi se ranikhet ke liye rawana huye. Safar kafi lamba aur khoobsurat tha. Dosto ke saath hasi thitholi karte, nachte gaate kab pahad shuru ho gaye pata bhi nahin chala. Dheere dheere chadhai shuru ho gai. Charo taraf hare bhare pahad dekh kar aankho ko badi shanti si mehsoos ho rahi thi. Thandi aur tazi hawa munh se takra rahi thi to man bada prafullit ho raha tha. Pahado se mjhe humesha pyar raha hai. Vo mausam, vo hariyali, vo hawa, vo sheetalta, vo shaleenta, bas pahado main hi mehsoos hoti hai. Ab ye khoobsurat safar shuru ho gaya tha.

In haseen vadiyon main chalte jaa rahen hain

hum tere vaaste dhalte jaa rahen hain

Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal
Photo of Ayarpatta,Nainital by Manas Agarwal

Dopahar hote hote hum jheelo ke shahr nainital pahunche. Nainital ghoomne ka socha to nahin tha pr ek dost ne ichcha jatai to gaadi se utar gaye. Sabse pahle naini mandir dekha aur fr thodi der naini jheel ke kinare baith gaye. Nainital ki mall road badi prasidhdh hai to mall road ghoomne chale gaye. Poori mall road duniya bhar ke sailaniyo se bhari thi. Mall road pr hi st. francis church tha to vahan bhi gaye. Church kafi sundar tha aur andar baithkar man ko badi shanti bhi mehsoos ho rahi thi. Ab tak bhookh lagne lagi thi to khana kha kar hum log ranikhet ke liye rawana ho gaye.

Shaam hote hote Ranikhet pahunche. Almora jile main stith ranikhet bada khoobsurt hill station hai aur parytan kam hone ki vajah se yahan zyada bheed bhaad bhi nahin hai. Kahte hain yahan raja sudhardev ne rani padmini ka dil jeeta tha aur fr rani ne yahan rahne ka faisla kia isiliye is jagah ka naam ranikhet pada. San 1869 main angrejo ne yahan kumaun regiment ki sthapna ki thi.

Humne hotel liya aur thodi der vishram karne ke pashchat ranikhet ghoomne nikal gaye.

Cheed aur deodar ke jangalo se bhara ranikhet adbhut lag raha tha. Hum aise hi jangalo ke beech main pedon ke neeche jaakr baith gaye. Aisa lag raha tha jaise duniya ke sabse shaant sthan pr aakr baith gaya hun.

chahkti chidiya sarsarati fizayen hain

kudrat ne bhi kya gazab saaz cheri hai

Alag alag prakar ki chirayen aur unki alag alag awazen kaanon ko bahut madhur lag rahi thin. Man to vahin baith kar meditation karne ka kar raha tha parantu raat hone lagi thi to khana kha kar vapas hotel aa gaye. Kafi thak gaye the isiliye neend bhi jaldi aa gai.

Agle din subah uth kar ranikhet ghoomne jaana tha. Subah halki baarish ho rahi thi isliye thand bhi badh gai. Baarish rukne ke baad hum ghoomne nikle. Sabse pahle ranikhet ka prasidhdh golf course dekha. Hara bhara cheed ke pedon se ghira golf course kafi sundar dikh raha tha. Thodi der tak vahin ghoomte rahe aur fr baith gaye. Vahan se nikal kar jhoola devi mandir gaye. Jhoola devi ka ye mandir vahan ke logon main bada mana jaata hai. Kahte hain ki is jagah jangli jaanvar logon ko kafi pareshan karte the, tab maa durga ne kisi ke swapan main aakr kaha tha ki is jagah khudai Kare to unki moorti milegi. Vahan mili is moorti ko jhoola devi kahte hain. Jabse mandir bana hai tab se jangli janvaro ne kisi ko pareshan nahin kia hai. Mandir main ghantiya baandhne ki pratha rahi hai, to poore mandir main 1000 se bhi zyada ghantiya bandhi hui thi. Vahan se hum chaubatiya garden dekhne gaye. Chaubatiya garden, sarkar dwara banaya gaya asia ka sabse bada seb ka baag hai. Uske paschat hum log sainya sangrahalya dekhne gaye. Kumaun aur naga regiment ke poore itihaas ko darshata ye sangrahalya bada daarshnik tha. Sangrahalya main pahle vishwa yudhdh se lekar aaj tak regiment dwara dushmano se hathiyaegai sabhi cheezen sammilit thi. Dushmano se hathiyae machine guns, unke jhande, hathiyar, us samay ke rajao ke bartan evam anek cheezen darshai gai thi. Main jab bhi aisi kisi jagah jaata hun bhartiya sena ke liye mera pyar aur samman aur zyada bhad jaata hai.

Jaan pe khela, bachaya hai tumne vatan

katre katre se tumne ye seecha chaman

Bhartiya jawano pr garv karte huye hum vahan se nikle aur bagal main hi shawl ka karkhana dekhne chale gaye. Haath se bante shawl dekhe aur fr shaam tak vapas hotel aa gaye. Pahle din ki shaam bhoole nahin the isliye vapas jangalo main jaane ka man kar raha tha. Fr raat hone tak cheed aur deodar ke jangalo ke beech tahalte rahe. Nazara bahut khoobsurat tha aur lautne ka man nahin kar raha tha, pr andhera ho jane ke karan vaapas aana pada. Raat ko vapas hotel main aakr so gaye.

Agle din subah Binsar ke liye nikalna tha. Subah naashta karke jaldi nikal gaye. Binsar se pahle Jageshwar dham gaye. Baharat ke jyotirlingon main se ek nagesh jyotirling yahan stith hai. 124 chote bade mandiro se bana aur deodar ki ghati ke beech main stith jageshwar dham ki shobha dekhte hi banti hai. Hum thodi der vahan baithe rahe. Itni bheed main bhi ek alag vatavaran, ek alag si shanti thi. Mandir main darshan karne ke pashchat jageshwar sangrahalya dekha jahan 9th shatabdi se lekar 13th shatabdi ke beech bani alag alag moortiyan aur akritiyan susajjit hain. Sangrahalya dekhne ke pashchat hum binsar ke liye nikal gaye.

Binsar ek wild life sanctuary hai jo bhinn prakar ke vanaspati aur pashuon se bhari hai. Yahan 25 prakar ke ped 24 prakar ki jhadiyan evam tendua, hiran jaise vibhinn pashu pakshi hain. Humne sanctuary ke beech sthit kumaun mandal ke guest house book karaya tha. Seedhe vahin jaakr ruke aur thodi der araam karne ke baad suryast dekhne nikal gaye. Guest house se lekar suyaast dekhne ke liye banaye gaye point main lagbhag aadha kilometre ki doori thi. Paidal chalte huye binsar ki khoobsurti dekhi. Pedon se latakti kai dekhte hi banti thi. Aise khoobsurat raaste se guzarkar oopar pahunche to suryaast hone main thoda samay tha isliye thodi der jangalo ke beech main ghoomte rahe. Jab shaam hone lagi to suryaast dkhne ke liye banaye gaye chabutre par aakr baith gaye. Surya himalya ke oopar badlo beech chamak raha tha. Achanak hi dhalna shuru hua aur secondo main himalya main ast ho gaya. Aise adbhut, apoorv, aur alaukik drishya ke liye har shabd kam hai.

In haseen vadiyon main aise doob gaya

humko laga ki humse rooth gaya

Vo drishya man se nikal hi nahin raha tha. Raat hote hote vaaps guest house aa gaye. Khana khaya aur thodi der hotel main bane chabootre pr baith gaye. Thand kafi thi aur kap kapi si ho rahi thi. pr dhyan akaash ki taraf gaya to sab bhool gaya. Itna saaf asmaan aur itne tare maine kabhi ek saath nahin dekhe the. Dulhan ki chunariya sa saja aasman man ko bha gaya tha. Mjhe Neeraj ji ki kavita yaad aa gai.

Aaj ji bhar ke dekh lo tum chaand ko

kya pata ye raat fr aaye na aaye!

Thodi der vahin baithe rahe aur fr kamre main aa gaye. Binsar main light nahin hai isliye mobattiyan jalai aur der raat tak baatein karte karte so gaye.

Binsar ki subah badi suhani thi. subah jaldi uth kar tayyar huye aur naashta karke zero point ke liye nikal gaye. zero point binsar ka sabse ooncha point hai. Lagbhag 2 km usi khoosoorat raste se chadhai karke vahan pahunche. Nazara bahut sundar tha, vahan se himalaya ki kafi chotiyan dikhti hain parantu dhundh kafi hone ke karan tab dikhai nahin de rahin thi. laut kar aaye aur patal bhuveneshwar ke liye nikal gaye. laut kar jaane ka bilkul bhi man nahin kar raha tha, binsar jagah hi aisi thi.

Binsar se Patal bhuvneshwar ki doori kafi zyada thi. Shaam hote hote patal bhuveneshwar pahunche. Vahan jaakar hotel lia aur gufa dekhne nikal gaye. Patal bhuvaneshwar gufa mandir jahan maana jaata hai ki 33 crore devi, devta ek saath virajman hai. Is gufa ki charcha skand puran ke manas khand ke 103ve adhyay main ki gai hai. San 1191 main is gufa ki khoj adi guru shankracharya ne ki thi. Manas khand ke anusar “jo anant shakti kee upasthiti mahasoos karna chaahata hai use pavitr raamaganga, sarayoo aur gupt ganga ke sangam ke nikat sthit bhuvaneshwar ke lie aana chaahie.” Gufa shuruat main patli thi par andar se kafi chaudi thi. Gufa main andar pahunche to chakit ho gaye. Poori srishti ka nirman mano ek hi jagah pr ho gaya ho. Gufa ki shuruat main sheshnag ki upasthiti hai. Aage smudra manthan main nikle airawat haathi aur uske 1000 paon hain. Ganesh ji ka sir, charo dham, charo yugo ke darwaze, kamdhenu gaye ka than jisme se doodh ki dhara bah rahi hai, hans ka tedha munh, shivji ki jatayen jisme se ganga bah rahi hai, brahma, Vishnu, Mahesh ki murtiyan, aur ant main vo sthan jahan pandavo ne shivji ke saath jua khela tha gufa main maujood hain. Gufa se bahar aakar mahsoos hua ki manas khand ki vo panktiya sach hain, vakai main anant shakti ka anubhav hota hai. Vapas aane ke baad hum log thodi der pahado ke beech jaakar baith gaye. In khoobsurat vadiyo ke beech ye humara akhiri din tha. Bahut der tak vahin baithe rahe, kudrat ko niharte rahe aur us khoobsurti main kho gaye. Raat ko kamre main jaakr so gaye, subah vapas nikalna tha.

Subah jaldi uth kar vapas un pahado se hote huye apne ghar aa gaye. Ye din kaise beete pata hi nahin chala, aisa lag raha tha mano koi swapan jee kar aa rahe hon. Kahte hain achche saathi hon to ghumne ka maza doguna ho jaata hai. Dosto ke saath masti ka star alag hi tha. Ye yatra mere jeevan kaal ki sabse khoobsurat yatra rahegi, jo main chahkar bhi bhula nahin paunga.

In khoobsurat nazaro main sab sukh dukh bhool gaye

hum zindagi ki saari pareshaniyan bhool gaye

kambakht bhoolne ka silsila kuch aisa chala

ki tum humko, hum tumko bhool gaye.

Frequent Searches Leading To This Page:-

Patal bhuvaneshwar uttarakhand trip, patal bhuvaneshwar how to reach, best time to visit patal bhuvaneshwar, patal bhuvaneshwar mystery