ભારત એ એટલો ભવ્ય ઇતિહાસ ધરાવતો દેશ છે કે આપણા દેશમાં અદભૂત, અલૌકિક, અકલ્પનીય, અવર્ણનીય તેમજ અનોખા બાંધકામો તેમજ શિલ્પ સ્થાપત્યોની કોઈ જ કમી નથી. કમનસીબીની વાત એ છે કે આવા અનેક સ્થાપત્યો પર આપણા સૌનું ધ્યાન ત્યારે જાય છે જ્યારે તેને કોઈ આંતરરાષ્ટ્રીય સ્તરે બિરદાવવામાં આવે. હમ્પીના મંદિરો, ખજુરાહો, મહાબલીપુરમ, મહાબોધિ મંદિર, ચોલાપુરમ, ચાંપાનેર, કૈલાસ મંદિર વગેરે આવા ઉદાહરણો છે જે UNESCO વર્લ્ડ હેરિટેજ સાઇટ બન્યા પછી ટ્રાવેલર્સમાં વધુ જાણીતા બન્યા હોય.
આવો જ એક કિસ્સો તાજેતરમાં બન્યો છે. તેલંગાણાના એક ઓછા જાણીતા રામપ્પા મંદિરને યુનેસ્કોએ વધાવી લીધું.
યુનેસ્કો સંસ્થાએ 25 જુલાઇ 2021 ના રોજ તેલંગાણા રાજ્યમાં સ્થિત રામપ્પા મંદિરને યુનેસ્કો વર્લ્ડ હેરિટેજ સાઇટ ઘોષિત કર્યું છે. તેલંગાણાના એક ઓછા જાણીતા રામપ્પા મંદિરને યુનેસ્કોએ વધાવી લીધું
રામપ્પા મંદિર વિષે:
રામપ્પા મંદિર વારંગલ જિલ્લામાં મુલુંગ તાલુકામાં પાલમપેટ નામના ગામમાં આવેલું છે.
તેલંગાણા રાજ્યના વારંગલ વિસ્તારમાં કાકટિય શૈલીમાં બંધાયેલા અમુક અદભૂત બાંધકામો જોવા મળે છે. આવું જ એક અનેરું મંદિર એટલે વારંગલ જિલ્લામાં સ્થિત રામલિંગેશ્વર મંદિર જે સામાન્ય રીતે રામપ્પા મંદિરના નામે લોકપ્રિય છે. મધ્યકાલીન યુગમાં ઈસવીસન 1213માં કાકાતી ગણપતિ દેવ નામના રાજાના શાસનમાં રામપ્પા મંદિર બનાવવામાં આવ્યું હતું. આ મંદિરને તેના મુખ્ય શિલ્પી રામપ્પાના નામ પરથી રામપ્પા મંદિર તરીકે ઓળખાય છે.
ભારતનું કદાચ આ એકમાત્ર મંદિર છે જેને તેના શિલ્પીનું નામ આપવામાં આવ્યું હોય. ખૂબ જ મનમોહક કોતરણીકામ ધરાવતા રામપ્પા મંદિરના નિર્માણમાં કુલ 40 વર્ષ જએટલો સમય લાગ્યો હતો.
મંદિરનું 6 ફૂટ ઊંચું શિખર, આકર્ષક પ્રદક્ષિણા પથ, તેમજ નંદી મંડપમ આ અદભૂત મંદિરના મુખ્ય આકર્ષણ છે.
કેવી રીતે પહોંચવું: વારંગલ શહેરથી આ મંદિર 70 કિમીના અંતરે છે જે વાહનમાર્ગે જઈ શકાય છે.
મંદિરનો સમય: દરરોજ સવારે 6.00 થી સાંજે 6.00
રોકાણ માટે: Haritha Lake View Resort Ramappa ખાતે રોકાણ તેમજ ભોજનની ઘણી સારી વ્યવસ્થા છે.
માહિતી: તેલંગાણા ટુરિઝમ
.