Dosto har saal ki tarah janamdin aata tha aur jata tha.Kambakht janamdin ke kab aane aur nikaljaane ke chakkar may mei kab 26 ka ho gya pta he ni chla. Khud ke liye waqt nikalna zaroori tha par kabhi dhyan nhi diya. Is baar socha janamdin par kahi hoke aana chahiye. 1 din shaam ko office se ghar aate waqt metro may safar ke waqt ek ladki thodi oochi awaaz may apne kisi jaankaar se phone par baat kar rhi thi. Tbhi achanak usne Tirthan Valley ka zikar kiya. Lekin usey kya pta tha ye zikr uska mujhe kitna sukoon de gya. Us din ghar pohoch kr mene poori research aur planning krli.Lekin hamesha ki tarah koi sath chalne ko raazi nahi tha.Sawaal pahado ka tha . Kabhi solo trip kiya nahi tha. Lekin research poori kr chuka tha. Birthday bhi aa rha tha. Mene faisla kiya k is baar akele he jaunga. Mene paytm k through volvo bus ki booking krali thi jo ki mujhe raat ko 10 bje chalkar mujhe AUT bus stand par subha 10:30 utaar deti. Jiska kiraya 1150 rs tha. Mei Friday raat ko delhi majnu ka tila bus stand se bus may baith gya. Thand ka waqt tha. Kohra b tha . Mei apne sath garam kapde aur 2 jacket leke chla tha.Raat 10 bje bus chal pdi. Kaafi excited tha lekin halka darr bhi tha . Kabhi akele 12 ghante lamba safar nahi kiya tha pahado may. Lekin bus ki seats kaafi comfortable thi.
Bus kuch aadhi bhari hui thi. Isme zyadatar student couples thay jo shayad apne future honeymoon ki rehearsal karne kullu manali jaa rhe thay. Aur us bus may mei ek akela insaan jiske baaju may baithne wala bhi koi na tha. Kheir bus ko chale 1 ghanta ho chuka tha aur hum qareeb sonepat pohoch chuke thay. Bus may har seat pr ek blanket b diya jata hai. aur mere pass aise 2 thay aur 2 seats . To mero khushi ka thikana nhi tha kyuki mei 1150 dekar 2300 rs ke maze le rha tha. Bus ab panipat pohoch chuki thi. Mei bhi apni muh boli girlfriend se video call par baat kar rha tha .Light band ho chuki thi isliye side may baithe couples ki gatividhiya dekh kar mei bhi video call par he uttejit hone laga. kuch der baad bus ek bade he wahiyaat dhabe par ruki . Mayur dhaba .waha mene 50 rs ki ek cup coffee khareedi jiska 1 ghoont bhra aur baaki fek di. Aap imagine kar sakte ho kya lajawab swaad hoga. Ye private volvo bus walo ki kuch khaas mitrata hai shayad us dhabe se. Dinner mei ghar se karke he nikla tha isliye khaane ki iccha thi nahi fir bhi biscuit aur maaza rakhli thi mene. Safar may kam he khana chahiye khaas kar jab aage safar pahad ka ho. Mei sone ki koshish kr rha tha lekin excitement may neend nahi aa rhi thi. Kohra kaafi badh chuka tha aur subha 4 baje humne chandigarh cross kar liya. Ab dheere dheere hum pahado ki aur chadna shuru kar rhe thay. Swaraghat pohoch kar achanak baarish hone lagi. Mujhe dar lga kahi baarish hoti rahi to landslide ho jayega aur mera pehla solo safar khrab ho jayega. Dheere dheere sooraj pahado ke peeche se upar ki aur uth raha tha jise sunrise kehte hai. Nazara kaafi achha tha. Dil khush hone lga . Lekin abhi bhi 4-5 ghante ka safar baaki tha.
Bus jaise jaise aage badh rahi thi nazara aur khoobsurat ho rha tha. Aur baarish bhi khatm ho chuki thi. Himachal ki vaadiyo may ghoomti meri laxmi ( i mean laxmi travels ki ye bus) kya nazare dikha rhi thi. Ab jaise jaise AUT pass aa rha tha nazare aur khoobsoorat ho rhe thay.Mei is highway pr zindagi may pehli baar safar kar rha tha. Shayad himachal ke ek behad khoobsurat hisse se waqif hone jaa rha tha. Ye sath behti Beas nadi jiska behad neela rang agey ke safar ki khoobsurati ka sandesh de rha tha. Kudrat ki khoobsurati niharte hue mera mann behad khush ho raha tha.Shayad ye mera sabse best birthday present tha meri taraf se khud ko.
10 bje bus Aut tunnel ke pass pohchi. Agar aapko banjar jana hai to aap tunnel se pehle he utar jaye . waha se 2 raaste jaate hai. Ek tunnel se hote hue manali aur doosra banjar ko. Mujhe jaankaari nhi thi isliye mei tunnel khtm hone ke baad utra. Lekin AUT ka bus stand jaha se bus bankar chlti hai banjar ke liye tunnel khtm hone ke baad he hai. waha se har 1 ghante may aapko banjar ke liye bus mil jayegi. Kiraya 40-50 rs hota hai.Pehli bus subha 7am baje aur akhri raat 7pm tk milti hai. Lekin raasta behad khoobsoorat hai. Mene tirthan valley may Anand Tirthan Camps book kiya hua tha. Waha ke owner Negi ji ka mei teh dil se shukriya ada krna chahta hu jinhone behad achhi service , guidance aur lajwaab khana provide kiya. Dosto tirthan valley vyast himachal se bilkul alag ek ghaati hai jaha tak pohochne ke liye raastey bohot aur highways ke tulna may kaafi sankeern hai . Is raaste pr agr aap gaadi se jaa rahe ho to satark hoke gaadi chalaye ,overtake krne jitni chaudi road nahi hai. Fir bhi is par himachal roadways ke drivers bohot bahaduri se logo ko apni manzil tak pohchate hai. Aut se tirthan tak ka safar kareeb 30 km ka hai jisko poora karne may bus 1 se 1:30 ghante le leti hai. Bus se utarne par us ghaati ki sundarta mei apni aakho se niharta he reh gya.
Off beat destination hone ke kaaran yaha camps may stay karna aur khana thoda mehenga hai. Lekin jo shaanti ka anubhav milta hai shayd he kahi mile. Bus se utarte he pass behti tirthan nadi ko mene jee bharke nihara. Thand kaafi thi isliye mei thoda kaanp rha tha. Waha ki shaanti ka andaaza aap is baat se laga sakte hai ki waha sirf nadi ke behne ki awaaz sunai deti hai. Dopahar ho chuki thi . Negi ji ne ek behtareen cottage mujhe provide kiya Jo poora lakdi se bna hua tha lekin uski sealing kapde ki thi jis wajah se raat may kambal ya rajai ko double krke odhna pdta tha. Mei us raat dinner karke jaldi so gya.
Har waqt sirf paani ke behne ki he awaaz aa rhi thi.Neend behad pyaari aayi . Raat ko jaldi sone aur swadisht dinner milne pr subha mei taazgi ke sath utha. Saamne behti nadi k pass jaake kuch der baitha. Kuch uski suni kuch Apni sunai. Hum dono he behad sukoon may thay. Paani bilkul taaza aur saaf. Behad shaanti mil rhi thi. Thodi der may nashta kiya. Nashta karke pass ke bazaar may tehelne gya. Waha jaake pta chla ke yaha aapke pass cash hona bohot zaroori hai. waha sirf ek he bank tha State bank of india. Atm khaali pade thay. To meri yahi salah hai k agar tirthan jaye to apne pass sufficient cash zaroor rakhein.Mere pass cash kam tha. Kheir waha ki taazi hawa jab shareer may jaati hai to insaan stress bhool jata hai. isliye mere pass cash kam to tha par mei pareshaan nahi hua. kyuki mujhe maloom tha pahad ke log bade mehnati aur madadgaar hote hai.
Subha kuch der market ghoomne ke baad mei wapas Anand camps may lauta. Waha mujhe Negi ji ne btaya ke pass he may Chhoie waterfall hai jaha tk pohochne ke liye 2 km ka ek trek hai . Bas fir mene trek karne ka faisla kr liya. Gushaini se banjar ki taraf jab jaate hai wapas Aut ki aur tb ye waterfall ka trek beech may shuru hota hai. Raasta thoda mushkil tha isliye mujhe 1 ghanta lga.
Chhoie waterfall may mere alawa koi nahi tha. Ye paani kaafi thanda tha. Mene apni bahein failakar shahrukh wala pose diya aur baaki kaam meri Mi ki selfie stick ne kiya. Is pahad pr dhoop na hone ki wajah se kaafi thand thi. temperature kuch 10 ya 11 degree k aas pas hoga. Kuch der photos lene aur baithne ke baad mei wapas hotel ki aur chal pda. Hotel waha se 3 km door tha jiske liye mujhe 1-1:30 ghanta lgna tha. Dosto akele ghoomna alg he anubhav mehesoos kiya mene. Jaha jaana chaho jao koi rok tok nahi. Aur waha is tarah ka insaan bhi nahi hota jo aapke sath kuch bura kre. Fir bhi satarak rahena he behtar hai. Beech may fishery department ka office pdta hai. Tirthan fishing activity ke liye bhi famous hai. Lekin November may fishing close rehti hai. Aur ye march may jaake khulti hai. Mei har lamhe ko mehesoos krte hue 2 ghante may hasta gungunata, hotel pohcha. jaha mene lunch kiya. Shaam 6 bje meri delhi ke liye bus thi jo wo mujhe usi duniya may wapas le jaa rhi thi jaha se door jana chahta tha. lekin Kal job par wapas bhi jana tha. Kuch der nadi ke pass baithkar mene AUT ke liye bus pakadli . Mann dukhi bhi tha aur khush bhi. Par kya krein . Khud se wada kiya ke samay samay par in lamho ko isi tarah jeeta rahunga. 6 Bje ki bus pakdi. Aur subha 5 bje delhi aagya.
Akhir may kuch zaroori baatein
Banjar-Gushaini-Tirthan, In jagah par vodafone aur idea ka sim kaam nhi krta.Mere pass 2 sim thay, 1 idea aur ek jio. Isliye aap bhi dhyan rakhein ke jio ki sim zaroor ho aapke pass. Aur online transaction ke liye wo jio ki sim bhi aapke account se link ho warna aapke pass OTP nhi ayega aur transaction nhi ho payega.
Jo buses Manali se aati hai aur Delhi ko jaati hai in buses ka stoppage AUT nhi hota isliye bus ke manali se chalne se pehle he aap driver ko bta dijiye k aap AuT se chadhenge.
Apne pass sufficient Cash zaroor rakhein.
Asha krta hu mere anubhav se aapko madad mili hogi. Agr meri koi bhi information galat lagi ho to kripya comment may btaye.